Tip:
Highlight text to annotate it
X
مرحبًا بكم في أسوان. هنا أول مكان أتوقف عنده خارج القاهرة.
إنها مدينة فى أقصى الجنوب, حيث يبدأ جزء مصر من النيل بعد بحيرة ناصر.
لكن هذه البحيرة لا تكون موجودة باستمرار. إنها أكبر بحيرة صناعية على مستوى العالم,
انشات مع بناء السد العالي في الستينات لكي تتحكم في تغذية مياه النيل وتوليد الطاقة الكهرومائية الخاصة بمصر
لسوء الحظ ان هذه البحيرة الصناعية قد غمرت أراضي الأجداد بالمياه وهجرت قبيلة عرقية تعرف بالنوبيين,
الذين كانوا يعيشون هناك منذ القدم.
إنهم الآن يمتلكون قرى تضم معظم السكان النوبيين حول هذه المنطقة,
وأكبر تجمع لهم في جزيرة الفانتين.
لقد قابلت العديد منهم, واحدهم هو من ابحر بمركب الفلوكا في النيل
والآخر هو "جاسر" الذي مكنني من طرح بعض الأسئلة عليه ليشاركني قصة عشيرته.
احنا في اسوان
وأنا عايز اتكلم عن الناس النوبي...ايه هو تاريخ النوبة؟
بص هو تاريخ النوبة دي قصة طويلة ... النوبة كانت مملكة عظيمة, كانت تعيش جنوب المملكة الفرعونية المصرية,
هي كانت مملكة بين مصر والسودان لفترة طويلة وكان لينا عادتنا ولينا تقاليدنا,
لغتنا، اكلنا وملابسنا مختلفة تمامًا عن المصرية والسودانية,
مع مرور الوقت المملكة الفرعونية كانت قوية جدًا ومعروفة طبعًا,
في يوم من الأيام النوبيين حبوا يحتلوا مصر الفرعونية في الأسرة الفرعونية الـ25 ،
الملك النوبي "طهاركا" هو احتل مصر حتى الشمال وقعد حوالي سنتين بيحكموا مصر لغاية ما مصر استعادة توازنها مرة تانية مصر الفرعونية،
وجم قضوا على النوبة كلها أو معظمها وهدموا المعابد النوبية وحاولوا يدمروا أي شيء يعبر عن النوبة أو يتكلم عن النوبة...
بس مع مرور الأيام ابتدى النوبيين يقلّوا يعني كميتنا مش كبيرة ومش كتيرة بين مصر والسودان لغاية كانت نقدر نقول بداية الكوارث
لما المصريين بنوا خزانات اسوان سنة 1902م هجروا بعض النوبيين عشان بنوا الخزان ده في أرضنا
وجم سنة 1912م عملوا تعلية لخزان اسوان هجروا مجموعة تانية من النوبيين
وكانت الكارثة الأكبر لينا سنة 1960م في عهد الرئيس الراحل جمال عبد الناصر
لما قرر يبني السد العالي فالسد العالي اخد مساحة كبيرة من أراضي النوبية
فهو هجر كل النوبيين العايشين في المنطقة هناك ووعدوا النوبيين انهم هيدوهم أراضي تانية بدل الأرض اللي خسروها
ووعد النوبيين أيضًا الرئيس جمال عبد الناصر انه في بحيرة هتنتج عن السد العالي هيسموها بحيرة النوبة
لكن بعد ماتعمل السد العالي سموها بحيرة ناصر على اسم الرئيس المصري مسموهاش بحيرة النوبة
ووعدوا كل نوبي اللي كان عنده نخلة هياخد نخلة واللي عنده بيت هياخد بيت،
الناس كلها كانت مزارعين نوبيين عايشين على النيل فلما هجروهم ودوهم في "كوم أمبو" مركز تابع لاسوان
ودوهم في الصحراء بعيد جدًا عن النيل فالنوبيين نسبة كبيرة من النوبيين اتهجرت
فالنسبة الكبيرة دي الموجودة في التهجير... معظم الرجال هجروا لبلاد الخليج العربي عشان يلاقوا عمل مفيش شغل في بلاد التهجير
فيمكن النساء والأطفال بس هما الموجودين هناك, لأن كلوا بيعمل في الخليج في الكويت والسعودية والامارات,
لكن زي هنا في جزيرة الفانتين وجزيرة أسوان والقرى المحيطة احنا متهجرناش عشان بعيد عن السد العالي
فاحنا طول عمرنا عايشين هنا ومحافظين حتى الآن على عاداتنا وتقاليدنا,
ولغتنا النوبية وملابسنا وخصوصيتنا بعيد عن المصريين,
يعني صعب إن مصري يعيش في قرية نوبية مع المصريين ممكن يكون في صداقة لكن جواز صعب يمكن يحدث الآن قليل جدا لكن لينا خصوصيتنا
بس وحتى تاريخنا هذا كل الحكومات المصرية اللي جات بعد الرئيس عبد الناصر والرئيس السادات والرئيس مبارك
كلهم كانوا بيوعدوا النوبيين بحقوقهم لكن حتى الآن مفيش حتى حكومة بعد الثورة حتى الآن احنا منتظرين…
لكن لسه مفيش جديد حتى الرئيس الحالي الرئيس محمد مرسي ,واحد من المتحدثين باسمه خلال الفترة الانتخابية قال الجالية النوبية في مصر
والجالية دي تعني ناس اغراب لكن احنا مش اغراب لما تقول جالية قول الجالية السودانية جالية افريقية جالية اوروبية
لكن احنا مش جالية وجه اعتذر بعد كده عن الكلمة دي واحنا اهو لغاية يومنا هذا عايشين ومبسوطين
واحنا فخورين ان احنا عايشين في مصر عشان مصر تاريخ عظيم ومصر مذكورة في القرآن وهي الدولة الوحيدة المذكورة في القرآن
ربنا قال "ادخلوا مصر امنين" فاحنا فخورين ان احنا موجودين في مصر... الحمد لله .
هل في لغة تانية الناس النوبي يتكلموها, انا عارف انتوا بتتكلموا عربي لكن في لغات نوبي؟!
طبعًا في لغتين نوبيتين: النوبة "الكنزية"، والنوبة "الفجركية "...
فاحنا هنا مثلاً جزيرة اسوان او الفانتين بنتكلم الكنزية لكن معظم اهالي التهجير 90% الفجركية
فاحنا مش بنفهم بعض الكنزي مش بيفهم الفجركي ولا الفجركي بيفهم الكنزي
وطبعًا المصري مش بيفهم ده... هو احنا طبعًا مبسوطين بكده احنا بنتكلم عربي وبنتكلم لغتنا الخاصة برده,
معلومة برده اللغة النوبية المصريين استخدموها في حرب 73 لما حاربنا اسرائيل علشان هما بيعرفوا يتكلموا عربي كويس جدًا
واي شفرة ممكن بتكلم بيها ممكن يحلوا اي شفرة لكن اللغة النوبية كانت حاجة جديدة تمامًا فاستفادوا بيها في حرب اكتوبر 73 .
هل في أي حاجة انت عايز تقولها ؟
أنا ممكن اشكر منظمة اليونسكو هما دايمًا بيحافظوا على اثار النوبة وتاريخ النوبة يمكن مصر مهتمتش مثل اليونسكو
فاليونسكو عملنا متحف النوبة وهو دايمًا بيبحث عن الاثار النوبية الغرقانة والمعابد النوبية
اللي غرقت تحت المياه هما اللي طلعوها هما اللي سعدوا بنسبة كبيرة حتى هنا في جزيرة الفانتين هما ليهم منطقة اثرية
حتى يومنا هذا اليونسكوا ودولة المانيا ودولة النمسا هما حتى الآن بيسعدونا وبيبحثوا معانا عن الاثار ... بنشكر اليونسكو جدًا.
- طيب, شكرًا
عفوًا - مع السلامة